အမေးကမ္ဘာ ဖြေစရာ（10）

deeperlay said...
မယ်ကု မေးချင်လို့
တစ်ယောက်တည်းနေတဲ့ အချိန်က အကြောက်ဆုံးအချိန်ဆိုရင်
အခုဆို အမြဲကြောက်နေတာပေါ့

Tue Sep 02, 05:54:00 AM 2008


ဟောတော့ ၊ စစ်စစ်ပေါက်ပေါက်မေးတယ်။
တယောက်တည်း နေရတဲ့အချိန်ဆိုတာ တကယ့်ကို တယောက်တည်း ရှိနေရတဲ့အချိန်ကို ပြောတာပါ။ ကိုယ့်ဘေးနားမှာ ဘယ်သူမှ မရှိပဲ တယောက်တည်း ရှိနေရတဲ့အချိန် ကြုံဖူးလား။ သူတပါးတိုင်းပြည်မှာ အဖော်မရှိပဲ တယောက်တည်း ရှိနေရတဲ့အချိန်ရှိခဲ့ဖူးလား။ ဥပမာ၊ သူငယ်ချင်းရှိတယ်ဆိုရင် ဒါ တယောက်တည်း နေရတာမဟုတ်တော့ဘူး။ မိသားစုရှိနေတယ်ဆိုရင်တော့ ပိုတောင် တယောက်တည်း မနေရတော့ဘူး။ မိတ်ဆွေရှိနေရင်လည်း တယောက်တည်း နေရတာ မဟုတ်ဘူး။ ဆိုလိုချင်တာကတော့ တယောက်ယောက် ကိုယ့်အနားမှာ ရှိနေတယ်ဆိုရင် တယောက်တည်း နေရတဲ့အချိန်မဟုတ်ဘူးလို့ ပြောချင်တာပါ။ Onlineမှာပဲရှိနေရှိနေ ကိုယ်နဲ့သိတဲ့လူတယောက်ယောက်သာ ကိုယ့်အနားမှာ ရှိနေခဲ့ရင် တယောက်တည်း နေရတာမဟုတ်ဘူးလို့ စဉ်းစားမိပါတယ်။ ဂျပန်ရောက်ပြီးနောက်နေ့ကစလို့ (3)လတိတိ အသိမရှိ၊ အပေါင်းအသင်းမရှိပဲ တယောက်တည်း နေခဲ့ဖူးပါတယ်။ တကယ့်ကို တယောက်တည်းမှ တယောက်တည်းပါ။ အရမ်းကို ကြောက်ဖို့ကောင်းတဲ့ အချိန်ကာလတွေပေါ့။ :c
ပြန်စဉ်းစားကြည့်ရင် အခုထိ ကြောက်တယ် (အဲဒီလို နေရမယ့် ဘဝကို) ။ အခုချိန်ထိ တခါတလေ အဲဒီလို တယောက်တည်း နေရတဲ့အချိန်တွေ ရှိနေတုန်းပဲ။
မြန်မာတွေအများကြီးနဲ့အတူတကွ နေနေရတဲ့နိုင်ငံက လူတွေက အဲဒီ ခံစားချက်ကို ခံစားဖူးမယ်မထင်ပါဘူး။ ဂျပန်မှာက မြန်မာတောထဲမှာ မနေလို့ကတော့ မြန်မာဆိုတာ တွေ့ကိုမတွေ့ပါဘူး။ ကျမ သူငယ်ချင်းစီနီယာအမ (1)ယောက်ဆို အဆောင် တခုမှာ နေတယ်။ သူမတယောက်တည်း မြန်မာရှိတယ်။ ကျန်တာ တခြားလူမျိုးတွေ ချည်းပဲ။ သူမမှာ မြန်မာစကားပြောရမယ့် လူလည်း မရှိဘူး။ သူမ အိမ်ကို ဖုန်းဆက်တယ်ဆိုလည်း ခဏပဲလေ။ ကျောင်းမှာလည်း မြန်မာတွေနဲ့ တွေ့တဲ့အချိန်က နည်း၊ Internetသုံးဖို့အချိန်ကို ပိုက်ဆံရှာရသေးတော့ Online friends ဆိုတာလည်း သူမမှာမရှိ။ အလုပ်မှာလည်း ဂျပန်တွေ ချည်းပဲဆိုတော့ သူမ မြန်မာစကားကောင်းကောင်း မပြောတတ်တော့ဘူးသိလား။ မြန်မာစကားမပြောပဲ (4)နှစ်လောက်နေလာခဲ့ရတော့ သူမပြောတဲ့ မြန်မာစကားက ဘိလပ်ပြန်မောင်သောင်းပြောသလိုဘဲ။ အိုးနင်းခွက်နင်းနဲ့ အရမ်းရယ်ရတယ်။ သနားဖို့လည်း ကောင်းတယ်။ တခါတခါ ခက်တဲ့စာလုံးတွေဆို(စကားပုံလိုမျိုး)ဆို သူမမပြောတတ်တော့ဘူး။ ကျမတို့နဲ့တွေ့ရင်တောင် ဂျပန်လိုပဲ ပြောခဲ့တာ။ ကျမက မြန်မာ၊မြန်မာချင်းဆို တတ်နိုင်သလောက် ဂျပန်လို မပြောတဲ့လူဆိုတော့ သူမက ဂျပန်လိုပြော၊ ကျမက မြန်မာလို ပြန်ဖြေနဲ့ စဉ်းစားကြည့်ရင် တော်တော်အူကြောင်ကြောင်နိုင်တယ်။ ;) သူမက သူမ သိချင်တာကို ချက်ချင်းမသိရရင် စိတ်ဆိုးပြီးအော်တယ်။{ နင်၊ ဂျပန်လို ပြောတတ်ရဲ့သားနဲ့ ဂျပန်လို ပြောတဲ့။ မြန်မာလို ငါစဉ်းစားရတာ စိတ်ညစ်လာပြီတဲ့။} သူမကို ကြည့်ပြီး ကျမအရမ်းကြောက်သွားတယ်။ :y ကျမလည်း သူမလိုဖြစ်သွားမှာကို (တယောက်တည်းနေတာကြာလို့ မြန်မာစကားကောင်းကောင်းမပြောတတ်တော့မှာကို)။ မြန်မာတွေနဲ့လည်းမတွေ့၊ မြန်မာတောထဲမှာ မနေနေတော့ အဲဒီလိုဖြစ်သွားတဲ့ သူမကို ကိုယ်ချင်းလည်းစာပါတယ်။ သူမက အခုဆို ကျောင်းလည်းပြီး၊Company မှာ အလုပ်ရသွားလို့ မြန်မာနိုင်ငံ ပြန်ချင်မှ ပြန်မှာဖြစ်တဲ့အတွက် မြန်မာစကား ကျွမ်းကျွမ်းကျင်ကျင် မပြောတတ်တော့လည်း ကိစ္စမရှိဘူးလို့ ထင်နေပါတယ်။ဒါပေမယ့် သူမလို ဘဝမျိုး ကျမ မလိုချင်ဘူး။ မြန်မာဖြစ်သောကျမသည် မြန်မာစကားတော့ ကောင်းကောင်းပြောတတ်ချင်သည်။ ထို့ကြောင့် မြန်မာတွေနဲ့ တွေ့ချင်သည်။ တယောက်တည်းနေရမှာကိုလည်း အရမ်းကြောက်သည်။

{ ထိုသို့သောအကြောင်းကြောင်းကြောင့် မြန်မာတွေနဲ့ တွေ့ရအောင် မြန်မာရှိသောနေရာဖြစ်တဲ့ Blogလောကကို ရောက်လာခဲ့သည်။ အပြင်မှာ မြန်မာတွေနဲ့ တွေ့ဖို့အခွင့်အလမ်းနည်းလို့ Blogလောကထဲ ဝင်ခဲ့တယ်ပဲ ဆိုပါတော့ရှင်။ ဒါပေမယ့် ၊ Blogလောကကလည်း အများသိတော်မူ ကြတဲ့အတိုင်းပါဘဲ။ ;) }(ဒါက၊ ကြေငြာဝင်တာ) :p

စကားမစပ်၊ အထီးကျန်ဆန်ခြင်းဆိုတဲ့ Postဟာ ကျမအကြောင်းကို ချည်းပြောထားတာ မဟုတ်ပါဘူး။ ကျမရဲ့ အကြောင်းနဲ့ ဆက်စပ်ပြီး ဂျပန်နိုင်ငံကမြန်မာတွေရဲ့(အထူးသဖြင့်၊ ကျောင်းသူကျောင်းသားတွေရဲ့) အခြေအနေကို တခြားနိုင်ငံက လူတွေသိအောင် ပြောပြချင်ခဲ့တာ။ ကျမ စာရေးမကောင်းလို့ ထင်ပါရဲ့။ ဘယ်သူမှ အဲ့ဒီ အကြောင်းကို မမေးခဲ့ကြဘူး။ ;)